2-6-2010

من فضلك انظر الصورة ..

اللوحة دي اشتريتها من فترة من راجل في بحري بيبيع تحف وحاجات للسياح من قدام القلعة. يومها كنت خارجة مع هناء ورانيا وركبنا مركب من قدام اللسان اللي هناك، الراجل قلنا أنا هوريكم اسكندرية كلها: المكتبة وسان ستيفانو والمنارة. مش عارفة إيه اللي خلاني أفتكر انه هيعدي من قدام الحاجات دي بالمركب فعلا وهيلففنا اسكندرية كلها لمدة نص ساعة في البحر.. أنا عارفة إني عبيطة، لكن بجد أنا صدقته وحسيت بفرحة غريبة أوي ساعتها، حسيت إن كل مكان همر عليه بالبحر ريحته هتوصلني، همسكها بإيدي وهحبسها جوايا أوي عشان أناديها وقت ما احتاجها.

لونها كان بني غامق، دافية زي الخشب، عبارة عن لوحة لميدان الرمل القديم محفور على حجر بازلت ومكتوب عليها من فوق "Alexandria"

الشجر اللي جواها بارز وجميل..

كان بقالي كتير محستش إني عايزة حاجة كدة. مش عارفة ليه افتكرت علطول فيلم "موعد على العشاء"، لما سعاد حسني فضلت واقفة قدام لوحة مرسوم عليها بنت صغيرة ماسكة ايد باباها وبيمشوا في طريق طويل وسط أشجار، كان نفسها تشتري اللوحة ومعرفتش، كانت في مزاد والراجل اللي قدامها فضل يعلي في السعر لحد ما خدها.. المشهد ده عبقري بجد في كل حاجة، في نظرتها للوحة وتمسكها بيها وعياطها عليها لما ماخدتهاش.

مكنتش حاسة إني سعاد حسني، كنت حاسة إني البنت الصغيرة اللي سعاد حسني كانت حاسة انها هي في الفيلم، وإن اللوحة والقلعة و محطة الرمل والبحر واسكندرية كلها هما بابايا.

المشكلة الأساسية اللي بتقابلك لما بتسافر.. مش إنك بس بتبعد عن المكان والناس والريحة اللي اتعودت عليها. المشكلة الحقيقية إنك بتخاف إن المكان ده نفسه ينساك.. وبتوصل لمرحلة إن كل اللي بتتمناه إن الناس اللي عرفتهم وحبتهم وحبوك يفضلوا فاكرينك أطول وقت ممكن، علشان يوم ما هينسوك هتحس إن كل حاجة راحت منك بجد..

أنا أخدت اسكندرية معايا عشان أدفي بيها حيطة باردة عارفة إني هلاقيها هناك. للأسف مش هعرف أخدكم معايا.. لكن أوعدكم إني هشيلكم وأدفي بيكم قلبي طول حياتي..