بلدنا من زمان اتفننت ازاي تربي فينا اليأس، علمتنا ازاي ناخد على قفانا ونقول كمان، علمتنا نرضى بالأمر الواقع لأن كلامنا ملهوش فايدة.. فساد في التعليم والصحة وغلو في الأسعار وناس بيتلموا كل عيد قدام المصانع والشركات الكبيرة اللي بتوزع لحمة بيدوقوها من العيد للعيد، وناس لحد دلوقتي بتشحت حق مرتبة لأنها نايمة على البلاط في عز البرد.. مرتبة! مش سرير حتى. بلدي ربتني على اليأس وأهلي ربوني على إن النتيجة أهم من الحدث.. لكن اللي حصل امبارح ده خلاني احترم الحدث وأقدر واعتذر للناس اللي موثقتش فيها. كنت فاكرة ان اللي هينزلوا هما هماهم مجموعة الشباب المثقف اللي بينزل كل مرة وبيرجع مش عامل حاجة،متوقعتش نزول الناس الغلابة والراجل المريض والست العجوزة اللي فضلت تزعق في الظباط وتقولهم ضيعتوا مصر وهما مش قادرين يردوا عليها.. بعتذر للناس اللي ماتت والناس اللي انضربت وباتت في الشارع، وبشكرهم لأن شجاعتهم حتى لو معملتش نتيجة لكنها زرعت فيا الأمل اللي كنت نسيت معناه من زمان أوي.
المشاركات
0 التعليقات:
إرسال تعليق