كادر خشب

لو حسيت الصورة زحمة.. ولقيت إن مش كل الناس تستاهل تكون في الكادر.. افتكر إن العدسة بتاعتك إنت.. إنت بس اللي تقدر تتحكم في النقطة اللي تنور على وش كل واحد.. وإنت بس اللي تقدر تلعب في الخلفية..

وتقدر كمان تحبس اللي انت عايزه في كادر خشب ميطلعش منه..

احبس عيلة أليطة كل واحد فيها فاكر إن فلاش الكاميرا هينورله لوحده..

احبس بنت عايقة ومضايقة إن لسه فيه ولد في البلكونة اللي قصادها مبصلهاش..

احبس شاب سايب حبيبته ومسافر يدور على لقمة أطرى م اللي بياكلها.. قولو العيب مش في اللقمة.. العيب في اللي بيستطعمها.. واوعى تصور حد تاني بخلفية بيضا..

احبس راجل عجوز مش عارف إن دي آخر سيجارة هيشربها..

واحبس أي حد مش لايق ع الصورة بتاعتك..

عايز تصور كادر واسع؟

صور ولد في عنيه شقاوة.. وغلاوة في عيون أم بتشاورله يضحك من بعيد..

صور صبية جميلة هتبعت الصورة لحبيبها يتونس بيها في أول 45 يوم في الجيش.. بس متنساش الخصلة السودا على عنيها وضفيرتها تبان كلها في الكادر..

صور عروسين هيحطو الصورة على أكبر حيطة في الصالون.. يمكن الكادر في يوم يفكرهم إن الضحكة كانت ماليه وشوشهم.. ومتنساش تخلي بوكيه الورد يضحك زي صحابه..

صور كل وش بيضحك.. أو مبيضحكش غير قدام العدسة بتاعتك..

طب ما تصور نفسك! *******************************

*النص ضمن مشروع دون لصورة الذي دعا له الأصدقاء على فيس بوك

*لينك الإيفنت على فيس بوك http://www.facebook.com/events/174420579324944/